الأربعاء، 29 يوليو، 2009

خناقة في المترو

امبارح و انا راجعة كان في خناقة في المترو...المترو كان زحمة اوي غالبا ده كان سبب الخناقة الرئيسي بس انا مش فاكرة ايه اللي حصل بالظبط ......كان في بنتين محترمتين و بنات تانية واضح انهم مش متربيين و عندهم عقدة النقص و الحقد الطبقي اتضح ده من جملتهم "يعني هما جايين من الزمالك و المهندسين" او مش كده بالظبط بس حاجة شبهها
الموضوع تطور لضرب و البنت المش متربية قطعت للبنت التانية الكم بتاعها () بس في البداية كان في حدف كلام و بعدين زق و بتاع ..بس اللي لفت انتباهي ان كل الناس عايزة تشارك.....ده اللي استغربته .انا الخناقة كانت جنبي بالظبط و لا ركزت و لا بصيت و لا فرق معايا بحاجة....بس اللي حواليا كل واحد عايز يتدخل و كل واحد عايز يدلي بدلوة...المهم البنت اللي الكم بتاعها اتقطع اتغاظت راحت حادفة الكانز و هي مليانة على البنات اللي ضايقوها في الاول و هما بينزلوا في محطتهم في المترو راحت الكانز خبطت في دماغ -و كان ممكن عين- واحدة ست تانية كانت نازلة هي كمان راحت واحدة ست تبع الست المخبوطة راجعة و ضاربة البنت و بعدين طلعت بسرعة قبل ما باب المترو يقفل
راحت واحدة تانية خالص كبيرة شوية في السن ملهاش علاقة بأي حاجة قعدت تتخانق مع البنت و تزعقلها و" افرض انا او امي او اختي كنا مكان الست اللي اتخبطت" و "حرام عليكي كان ممكن عينها تروح" و البنت ترد بزعيق برده"و انتي فكرانة مبسوطة ده كان ضيق جوايا عشان هما ضربوني و بتاع و مكنتش اقصد انها تيجي فيها" و الست الكبيرة محموقة قوي و بتتكلم بعنف و بتزعق و بتاع
انا باحس ان المصريين معندهمش الفرصة الكافية للتعبير عن رأيهم فبيعبروا عنه فياقرب فرصة.......عندهم "كبت رأيي" لول....و الله معرفش بس انا استغربت انه كله عايز يشارك و يقول رأيه في الخناقة حتى انا في اخر الموضوع خالص اتأثرت و كنت شوية و هاتكلم رغم اني مليش دعوة خالص
بس التساؤل الاهم.......(هو ربنا خلق الناس البيئة دول ليه؟؟)

ليست هناك تعليقات:

إرسال تعليق