DOGTOOTH

حصل النهارده الصبح

كنت باعمل داونلود-امبارح بالليل- لفلم يوناني حصل على شهره عالميه و جوايز بالهبل و مترشح للأوسكار

سبت الداونلود يكمل للاخر و دخلت نمت

أول ما الداونلود خلص....الفلم فتح و ساعتها انا كنت نايمه و كانت اختي هي اللي قاعده على الكمبيوتر و تقريبا شافته أو شافت اجزاء منه

و بعديها بشويه أو بكتير -معرفش بالظبط- صحيت أنا من النوم

و مكنتش فايقه أوي -نص في الواقع و نص في الحلم يعني- و سمعتها بتقوللي

هي:"ايه الفلم اللي انتي كنتي فاتحاه ده"؟

أنا :"فلم ايه؟ أنا مكنتش فاتحه حاجه"؟

هي:"فلم انتي كنتي فاتحاه , ده فلم قليل الأدب"

أنا " انا مكنتش فاتحه حاجه"

هي:" ده قليل الأدب , فيه ناس عريانين- و تبتسم و هي تقول عريانين-"

ساعتها تقريبا افتكرت حوار الداونلود

"فلم قليل الأدب؟؟ بجد ؟طب اوعي تتفرجي عليه"-بشوية سخريه و شوية لا مبالاه-

...................................

و قمت صليت الفجر و بعديها دخلت نمت

مره قريت أن كلمة"أليط" أصلها elite بالانجليزي

:))

شيء يدعو للتأمل فعلا لو تفكر فيه :)

هما فعلا فيهم كتير من الألاطه

منذ ما يقارب العامين كان هناك ثمة الحاح أن " أهتم بمظهري" كفتاه "بنت ناس" واقع علي من جموع الاناث المحيطين بي

و بعد جهد طويل-أنا أكره الموضه و الملابس أصلا-غيرتها و أوليت جسدي اهتماما أكبر و أصبحت ألبس "مثلهم"....

الان

هناك ثمة الحاح علي بأن أرتدي ملابس " محتشمه" و "واسعه"

هي كانت واسعه أصلا

و كانت محتشمه أصلا

و أنتم جعلتوها ضيقه

ما هذا؟

بففف اشعر باختناق........شكلي اخدت جرعه سياسيه زائده.........القراءه في السياسه بتوتر أعصابي و بتخليني معرفش اقرا عن السينما

مهرجان فينيسيا بقاله بتاع اسبوع و انا لسه معرفش حاجه عنه بففففففف و لا حتى عرفت اشوف الافلام اللي كنت حاطاها

يخربيت السياسه و عواطفها و تحميسها الزائد و افتقارها للعقل و المنطق

يا رب اخرج من الحاله دي بسرعه

أكتر حاجه باحبها في حوار "دعاة التلفزيون" بوجه عام و ان الداعيه يبقى ليه برنامج دوري على التلفزيون و جمهوره يتابعه فيه انها خلت الداعيه الاسلامي زيه زي الرقاصه و المغنيه و بالتالي اتنزع عنه كتير من قدسيته و بقى المواطن العادي اجرأ في الهجوم عليه و انتقاده من الاول

طبعا الموضوع لسه في بدايته لكن مع الوقت الناس فعلا بتنزع الهيبه عن كتير من اللي كانت بتحترمهم من شويه و بتبدي تشتم فيهم و تنقلب عليهم و دي حاجه حلوه لأن بثبت لي ان رغم كل شيء الناس لسه عايشه و لسه بتفكر

تاني حاجه ظهور ما يسمى بد"التلفزيون الاسلامي" كبديل للتلفزيون "الغربي الكافر المنحل" هو اكبر دليل لي على ان كتير من الناس دي مش عارفين هما بيعملوا ايه و لا عارفين طبيعة التلفزيون نفسه و بيتعاملوا معاه كأنه اله محايده

طبعا في فرق ما بين واحد بيطلع في قناه في برنامج ديني في رمضان مثلا بيحاول انه يستغل انتشار التلفزيون للوصول لجمهوره الاصلي خلال فتره معينه او التعرف بجمهور جديد

و واحد تاني متبني "ثقافة التلفزيون" كوسيله للتواصل المستمر بينه و بين الجمهور و الاعتراض الوحيد عالتلفزيون هو على المحتوى مش على الاله في حد ذاتها

زي مثلا قنوات المجد و غيرها

و لما واحد شيخ يطلع و يقول كلام معناه ان التلفزيون كان زمان كله فساد و بتاع لكن لما يتم استخدامه لمشاهدة البرامج الدينيه وبتاع يبقى مفيد و حاجه كويسه

هما نفسهم بعد كده هيشهدوا انهيار مصداقيتهم لدى اتباعهم و انعدام هيبتهم ده غير الملل و هيتم استبدالهم

لأنهم مش عارفين هما بيعملوا ايه و مش عارفين يعني ايه تلفزيون اصلا